An Egyptian living in Europe but her heart stayed back home. Having some random thoughts about the before and after pictures. Ghawayesh means bracelets. In my context it symbolizes the cuffs of my culture. I don't know if I like them or hate them. Thanks for passing by.

About Me

My photo
I started this blog in 2006 as a joke. Now that I look back, I have decided to take it seriously!

01 October 2013

احكى يا شهرزاد




.
هو-تصورى من نظراتك الخجوله ليا .. انا شايف ان العشره بيننا مش هتكون مستحيله لان فى .. فى قبول متبادل .. بس انا راجل احب المسائل تبقى واضحه ، اللى اوله شرط اخره نور

هى- أتفضل .. اومال احنا هنا ليه ، علشان نسمع بعض على الاقل

هو- احب اكون واضح وصريح

هى- ياريت

هو- اول حاجه .. عايزك تلتزمى بالحجاب .. ساكته ليه !؟

هى- افضل اسمع شروطك كلها للاخر وبعدين اتناقش فيها ، وانا بعدها هبقى اقولك كل شروطى وبردو نتناقش .. اتفضل

هو- أنا عندى شقه براح 160 متر تمليك تمنها مدفوع بالكامل ، فرشها هيكون عليكى بالكامل

هى- بالكامل !.. ازاى يعنى ؟

هو- شوفى ياحبيبتى .. واسمحيلى اقولك ياحبيتى ، اعمالا بمبدا المشاركه بيننا وبين بعض دايما فرش الشقه بيكون على زوق العروسه وعلى حسابها بالكامل

هى- ممم ماشى الحال ..

هو- عشان كده انا كتبت مبدا المشاركه فى حياتنا بيننا وبين بعض واسمحيلى ان انا اتلوه عليكى .. اداره البيت التنفيذيه حق مطلق ليكى ، لكن الاداره السياسيه بتاعتى

هى- مش فاهمه

هو- يعنى مفيش صغيره او كبيره تتم فى البيت الا بعلمى ، حتى لو كنتى هتشترى كيلو بطاطس للطبيخ

هى- وكمان انا اللى هطبخ !!

هو- انا راجل احب اكل من ايد مراتى ، ومحبش الشغاله تبقى فى البيت

هى- اوعى تكون بتتكلم جد ، اومال مين اللى هيعمل شغل البيت ؟

هو- انا وانتى ، انتى هتغسلى وانا هكوى ، انتى هتنظفى وانا هلمع .. وهكذا

هى- وماذا بعد ؟ جمله دايما بسمعها فى المسلسلات التاريخيه

هو- بالنسبه للمرتب .. مرتبى ومرتبك هيتحطوا على بعض ، وانا اللى هحدد اوجه الصرف

هى- ومصروفاتى الشخصيه وبنزين عربيتى ولوازم الستات والكوافير ؟

هو- كوافير ايه بقى ماحنا قولنا هنلتزم بالحجاب .. والنزين حكايته مُنتهيه ..

هى- منتهيه ! .. منتهيه ازاى انا عايزه اعرف ؟

هو- أحنا بيت واحد يعنى عربيه واحده .. انتى تبيعى عربيتك وانا ابيع عربيتى ونجيب عربيه جديده ، وابقى اوصلك الشغل وامر عليكى اخدك البيت

هى- طب لو فرضنا ، وفرضنا ليه ماهو اكيد حاجه زى دى هتحصل .. لو فرضنا بقى انك سافرت مع مسئول من بتوعك اعمل انا ايه ؟

هو- وارد طبعا .. فى الحاله دى تتفقى مع زميله ليكى انها تمر عليكى وتاخدك معاها الشغل ، واذا زنقت اوى تاخدى تاكسى والامر لله

هى- اخد تاكسى وامرى الى الله .. ليه العربيه متفضلش معايا ..؟

هو- اخاف عليكى من السواقه ياماما

هى- عندك شروط تانيه ؟ .. اتفضل قول

هو- هى مش شروط ولكن هى امور انسانيه من الواجب ان احيطك علما بها

هى- اتفضل

هو- ماما عايشه

هى- ربنا يديها طولة  العمر

هو- عندها 72 سنة

هى- وهتعيش معانا؟

هو- مش بالظبط ، لكن هى بتحب تغير جو كل شوية

هى- أهلاً بيها فى اى وقت

هو- اصيله وبنت ناس ، صدق اللى قال اللى يصبر ينول

هى- أستاذ احمد أحنا قولنا ان فى مناقشة

هو- بس البشاير باينه على وشك .. عموما انا جاهز للمناقشة

هى- الاقى ولاعة مع حضرتك ؟ .. ميرسى

هو- أيه ده ياماما ؟ .. انتى بتشربى سجاير ؟

هى- لما نتفق هبطلها .. أستاذ احمد انت عاوزنى اتحجب ، وافرش الشقه بالكامل على حسابى وااطبخ وانظف وتاخد مرتبى وتبقى المدير المالى والعربيه مش عاوزها وعاوزنى كمان اخدم الست الوالده لما تيجى ان شاءالله تقعد معانا علطول .. انا موافقه بس عايزه اسألك سؤال لو رديت عليا صح هبقى فعلاً موافقه

هو- اسألى ياماما .. 

هي - كل اللى فات ده انا هعمله وهقدمه ، بس فى المقابل عايزه اعرف انت هتقدملى ايه ؟

هو- المهر والشبكه طبعاً

هى- مش قصدى .. قصدى فى الحياه فى العيشه المشتركه ؟

هو- هأبقى جوزك

هى- أيوه يعنى ايه ! .. عاوزه اعرف هتبقى جوزى دى معناها ايه ؟

هو- بشويش ياماما مش كده ، نتناقش بهدوء

هى- دى مش مناقشه ، ده سؤال وجواب .. سؤال وجواب وتخلص الحكايه .. انا عاوزه اعرف هتبقى جوزى يعنى ايه ؟

هو- جوزك يعنى جوزك ..

هى- يعنى تنام معايا .. تعاشرنى .. انت راجل اهبل .. اه والله اهبل .. يعنى عايز تاخد فلوسى وتشغلنى خدامه وتفرض عليا شروطك وشروط امك وتقولى هتبقى جوزى عشان تنام معايا بس ؟.. لو كان الجواز مفهوش غير نوم ع السراير يبقى من حقى اختار الراجل اللى ينام معايا .. ياراجل ياعره

إحكى يا شهرذاد



No comments:

Blog Archive

Look Who's Here :D